EGABeko presidentearen bloga

Euskadiko Ekonomia eta Gizarte Arazoetarako Batzordea

Presidente CES Vasco

Esker onak

Joan de ostiralean, apirilaren 5ean, Euskadiko Ekonomia eta Gizarte Arazoetarako Batzordeak bere osoko bilkura egin zuen. Aztergaien zerrendan zegoen, besteak beste, EGABren 5/19 Irizpena, hau da, aurtengo kontsulta-organoaren bosgarren irizpena onartzea. Euskadiko turismo-enpresa eta -jardueren erregistroari buruzko dekretu-proiektua erantzuteko zen, Eusko Jaurlaritzako Turismo, Merkataritza eta Kontsumo Sailak gure iritzia ezagutzeko bidali ostean. Irizpena EGABren osoko bilkurak onartu zuen eta, ondorioz, sailari bidali zaio, gure gogoetak kontuan har ditzan. Orokorrean, EGABk positiboki balioetsi zuen gobernuaren ekimena eta, bai ekonomia eraginarengatik, bai gizartean ondorioengatik gero eta garrantzitsuagoa den sektorean izaten ari diren aldaketa eta berrikuntzekiko turismo araudia eguneratzearen testuinguruan kokatu zuen.

Baina ez da nire asmoa sarrera hau irizpenaren xehetasunei eskaintzea. Interesa duenak Euskadiko Ekonomia eta Gizarte Arazoetarako Batzordearen web orrian erraz egin dezake, gure lan guztiak, noski, irekiak eta jendearentzat irisgarriak baitira. Egiaz, osoko bilkura honen aztergaien zerrenda gogorarazi izan nahi dut, niretzat berezia baitzen. Izan ere, Euskadiko EGABren batzordeburu gisa parte hartzen dudan azkena izan da. Nire agintaldia erakundearen buruan amaierara iritsi da. Denboraren ikuspegiak urte hauetan ondo egindakoa eta akatsak balioztatuko ditu. Dena delakoa, niretzat urte hauek biziak eta liluragarriak suertatu dira. Osoko Bilkurako kideak agurtzeko erabili dudan diskurtsoan, bihotzez eskertu nahi izan diet nire agintaldian erakundearekin izandako leialtasuna eta, aldi berean, nire esker onak azaldu dizkiet egindako lanarengatik, ekonomia eta gizarte arazoetarako batzordearen ardatz nagusia baita. Irakurri Euskadiko EGABren batzordeburuaren agurra

Entrada_CES

Epe laburreko betaurrekorik gabe

Gure gizarte garaikidearen urritasun nagusi bat da epe luzera ikuspegirik ez izatea. Epe ertainera ere, esango nuke nik. Ikuspunturik eza, epe labur zorrotz eta lotsagabeari mendekotasuna. Honi buruz hausnarketa egin nuen duela egun gutxi batzuk Euskadiko Ekonomia eta Gizarte Arazoetarako Batzordeari buruzko jarduera-memoria aurkezteko testu laburra idatzi nuenean. Daniel Innerarity filosofoaren hitzak ekarri nituen gogora. Berak atsegin handiz hitzaldi bat eskaini zigun joan den uztailean, Bilbon jendaurreko ekitaldian urtero Batzordeak aurkezten duen memoria sozioekonomikoa azaldu genuenean. Innerarityk gobernamenduari buruz egin zuen berba eta arestian aipatzen nuena adierazi zuen. Nolanahi ere, egungo gizartea etorkizuneko gaiei aurre egiteko ez da gai, ikuspegia izatea eskatzen badute. Bere hausnarketak oroitu nituen eta horien inguruan gurearen antzeko kontsulta-organoaren zereginari balioa eman nahi izan nion. Hain zuzen, bere ekarpen nagusia arazoak ikuspegiz lantzean datza. Horrez gain, modu adostuan gauzatzen du, Euskadiko ekonomia- eta gizarte-eragileek zilegi ikuspegi desberdinak eztabaidatu ostean. Alderaketa egitean epe laburreko betaurrekoak ez erabiltzen saiatzen gara eta berehalako emaitzaren presioa baztertzen dugu.

Euskadiko Ekonomia eta Gizarte Arazoetarako Batzordea gaiak ikuspegiz aztertzeko eztabaida-gunea da. Nolanahi ere, oso alderdi desberdinak eztabaidatzen dira, gure aginpideko ekonomia- eta gizarte-gaiak badituzte hizpide. Organo bizia, egun puri-purian dauden gaiei buruzko lanak eta ikerketak garatzen dituena. Laburbilduz, gure Autonomia Erkidegoan, baita kanpoan, Europan ere berezko ahotsa duen Batzordea. Euskadiko EGABren 2018ko jarduerei buruzko memorian egiazta dezazuen gonbita luzatzen dizuet, urtean zehar gure zereginak jasotzen dituen notario-akta baita.

CES Madrid

Lanaren etorkizuna, idatzi gabe dagoena

Joan den astelehenean Madrilen egon ginen Espainiako EGABk antolatutako jardunaldian. Lanaren etorkizunari buruzko azterlana aurkeztea zuten helburu. Txostena Erreinuko EGABren Lan Harreman, Enplegu eta Gizarte Segurtasun Batzordeak egin du eta oso interesgarria da, ikuspegi orokorretik eta europarretik antzematen diren erronkak lantzen baititu. Askotan proposamenak eta erantzunak eskaintzen dira. Datorkigun etorkizunak ekonomia- eta lan-ereduak eraldatuko ditu. Dena delakoa, etorkizun hori jada kasu askotan oraina da. Iraultza digitala, robotizazioa, bete-betean eragiten ari dira, ez bakarrik ekoizpenean, baita lana antolatzeko moduan ere eta horrek guztiak eredu berriak ekarriko ditu. Jakitun gara gaur egungo enpleguak eta lanpostuak aldatuko direla eta ordezkatzeko berriak azalduko direla (sektore sortu berriak, ekonomia berdea, pertsonen arreta…).

Jardunaldiari berriz eutsiko diot. Magdalena Valerio Lan, Migrazio eta Gizarte Segurantzako ministroak inauguratu zuen. Azterlana aurkeztu ondoren, mahai-inguru interesgarria izan zen eta hurrengoek parte hartu zuten: CEOEko presidenteak, Antonio Garamendik; baita UGT eta CCOOko idazkari nagusiek, Pepe Álvarezek eta Unai Sordok ere. Gidari-lanetan OIT bulegoko zuzendaria Espainian, Joaquín Nieto, aritu zen. Guztiek, gobernuak, patronalak eta sindikatuek, lanean aldaketei arrakastaz aurre egiteko gizarte-elkarrizketaren eta etengabeko prestakuntza iraunkorraren garrantzia berretsi eta defendatu zuten. Nik erantsiko nuke, zorionez, aldaketa askoren norabidea eta zentzua aurrez jakin daitekeela. Eta ikuspegi optimista horretatik abiatuta, Marcos Peña Espainiako EGABko lehendakariaren hitzak baieztatzen ditut, hau da, “etorkizuna ez dago idatzia”. Gure mende dago. Orainaren esku ageri da. Etorkizunak aurrerapena eta onura ekarriko digu, betiere egungo prestaketa-lanekin asmatzen badugu eta Madrilen aurkeztutako txostena abiapuntu aproposa da.

Page 1 of 32

© 2017 Copyright Consejo Económico y Social Vasco | Euskadiko Ekonomia eta Gizarte Arazoetarako Batzordea