EGABeko presidentearen bloga

Euskadiko Ekonomia eta Gizarte Arazoetarako Batzordea

Category: CES (Page 1 of 4)

CES Madrid

Lanaren etorkizuna, idatzi gabe dagoena

Joan den astelehenean Madrilen egon ginen Espainiako EGABk antolatutako jardunaldian. Lanaren etorkizunari buruzko azterlana aurkeztea zuten helburu. Txostena Erreinuko EGABren Lan Harreman, Enplegu eta Gizarte Segurtasun Batzordeak egin du eta oso interesgarria da, ikuspegi orokorretik eta europarretik antzematen diren erronkak lantzen baititu. Askotan proposamenak eta erantzunak eskaintzen dira. Datorkigun etorkizunak ekonomia- eta lan-ereduak eraldatuko ditu. Dena delakoa, etorkizun hori jada kasu askotan oraina da. Iraultza digitala, robotizazioa, bete-betean eragiten ari dira, ez bakarrik ekoizpenean, baita lana antolatzeko moduan ere eta horrek guztiak eredu berriak ekarriko ditu. Jakitun gara gaur egungo enpleguak eta lanpostuak aldatuko direla eta ordezkatzeko berriak azalduko direla (sektore sortu berriak, ekonomia berdea, pertsonen arreta…).

Jardunaldiari berriz eutsiko diot. Magdalena Valerio Lan, Migrazio eta Gizarte Segurantzako ministroak inauguratu zuen. Azterlana aurkeztu ondoren, mahai-inguru interesgarria izan zen eta hurrengoek parte hartu zuten: CEOEko presidenteak, Antonio Garamendik; baita UGT eta CCOOko idazkari nagusiek, Pepe Álvarezek eta Unai Sordok ere. Gidari-lanetan OIT bulegoko zuzendaria Espainian, Joaquín Nieto, aritu zen. Guztiek, gobernuak, patronalak eta sindikatuek, lanean aldaketei arrakastaz aurre egiteko gizarte-elkarrizketaren eta etengabeko prestakuntza iraunkorraren garrantzia berretsi eta defendatu zuten. Nik erantsiko nuke, zorionez, aldaketa askoren norabidea eta zentzua aurrez jakin daitekeela. Eta ikuspegi optimista horretatik abiatuta, Marcos Peña Espainiako EGABko lehendakariaren hitzak baieztatzen ditut, hau da, “etorkizuna ez dago idatzia”. Gure mende dago. Orainaren esku ageri da. Etorkizunak aurrerapena eta onura ekarriko digu, betiere egungo prestaketa-lanekin asmatzen badugu eta Madrilen aurkeztutako txostena abiapuntu aproposa da.

CES_CPMR

Europako Eskualde Periferiko eta Itsastarren Konferentzian

Funchalera, Madeirako hiriburura, joan gara eta gaur arratsaldean CRPM (Europako Eskualde Periferiko eta Itsastarren Konferentzia) erakundearen 46. Batzar Nagusia inauguratuko da. Hemen 160 europar eskualdeetatik gorako ordezkariak daude eta 200 milioi pertsona bizi gara bertan. CRPM batzorde geografikoen inguruan egituratzen da. Guztira zazpi ditugu eta gu Arku Atlantikoaren kideak gara. Europako garapen orekatuagoa sustatzea du helburu, Batasunean ekonomia, gizarte eta lurralde kohesioa sendotzeko.

Jada aipatu den bezala, inaugurazio ofiziala gaur arratsaldean izango da. Lan saioak, berriz, atzo hasi ziren. Ordezkaritza nazional desberdinek eta nazioarteko batzorde geografikoek paraleloan bilerak eta tailerrak egin zituzten. Gaur Portugalgo lehendakaria, Marcelo Rebelo de Sousa, 46. Batzar Nagusiaren inaugurazioan buru izango da eta Europaren etorkizunari buruzko lehenengo saioak irekiko ditu. Etorkizuna zalantzez beteta dago eta bertan bilduta gauden guztiei kezkatzen digu.

Izatez, etorkizun oro ez-jakina dela badakit, baina horizontean hodei beltzak, besteak beste, Brexita ditugu eta, itxuraz, ekaitza ekarriko dute. Beraz, aurre egiteko prest egon behar dugu. Erresuma Batua irteten denean, Batasunean aurrekontua nabarmenki murriztuko da. Jada aurkeztu dira finantza lehentasun berriak, baina kohesio politiketarako funtsekin lehian jardungo dute. Egiaz, Europako Eskualde Periferiko eta Itsastarren Batzordeak defendatzen duen ekonomia, gizarte eta lurralde kohesioa hurrengo erkidegoaren aurrekontuak orekatzeko europar erakundeen negoziaketetan arriskuan dago. Egoera horren aurrean, CRPM Funchaletik mezu bateratua zabaltzen saiatuko da egun hauetan. Ikusiko dugu lortzen al den. Bien bitartean, gure eskualdea hainbat arlotan (hala nola, itsas politika integratua, irisgarritasuna eta garraioa, migrazio krisia edo klimaren aldaketa) nahasi eta bertan eragiten duten lan saioak hurbiletik jarraitzen saiatuko gara.

Memoria de actividades

2017: proiekzioa eta jarduera Europan

Joan den urteko Euskadiko Ekonomia eta Gizarte Arazoetarako Batzordearen Jarduera Txostenari begira prestatu dudan aurkezpen testuan 2017. urtean Euskadiko EGABk kanpoan izan zuen proiekzio bizia azpimarratu nahi izan dut. Otsailean Sare Transnazional Atlantikoaren burutza gure gain hartu genuen. Bertan Portugal, Espainia, Frantzia, Erresuma Batua eta Irlandako eskualde atlantikoetan ekonomia eta gizarte arazoetarako batzordeak nahiz antzeko erakundeak biltzen dira. Onartu genuenean, bultzada ematearen borondate sendoa azaldu genuen eta ezinezkoa litzateke mugaz haraindiko lankidetza lanean Euskadiko EGABren esperientzia luzerik gabe. Ildo horri eutsiz, bereziki erreparatu behar zaio duela denbora asko Nouvelle Aquitaineko EGKrekin garatzen ari denari. Pasa den urtean kanpoko hemezortzi lan saiotan eraginkortasunez parte hartu eta esku hartu genuen eta oso gai desberdinak landu ziren. Halaber, berrikuntza eta transferentzia teknologikoari buruzko txosten erkide interesgarria bukatu genuen. Dena den, STAren eremuan ondorio handiena izan duen lan bateratua honako txostena izan zen: “Ekintza Plana tartean aztertzeari begira Estrategia Atlantikoa hobe inplementatzeko gizarte zibilaren proposamenak”. Izenburuak berak adierazten duen bezala, Sare Transnazional Atlantikoak egindako proposamen multzoa biltzen du. Joan den urtearen abenduan Bruselan aurkeztu ziren Europako Ekonomia eta Gizarte Arazoetarako Batzordearen aurrean. Proposamenek interes handia sorrarazi zuten eta egun Europar Batzordeko agintariek Estrategia Atlantikoari buruzko Ekintza Plana ebaluatu eta berraztertzeko erabiltzen ari dira. 2017ko Jardueren Txostenaren sarreran adierazi dudan bezala, nazioarteko lankidetza lan honekiko adostasunak eta seriotasunak Europa Atlantikoaren etorkizuna erabakitzen den eztabaida-guneetan STA solaskide trebatu bihurtu dute.

2017. urtean Euskadiko EGABk garatutako kanpoko jarduera oparoak ez zuen ahuldu kontsulta zeregina, EGABren ardatz nagusia dela ez baita ahaztu behar. Osoko bilkurak, ekimen propioko azterlanak eta Batzordearen eguneroko lana azpibanatzen duten batzordeen (batzorde iraunkorra, gizarte garapenerako batzordea, ekonomi batzordea, txosten sozioekonomikoa…) jarduera ugariak; horiek guztiek 2017ko Jardueren Txostenak leialtasunez egiaztatzen duten lan bizia adierazten dute.

Page 1 of 4

© 2017 Copyright Consejo Económico y Social Vasco | Euskadiko Ekonomia eta Gizarte Arazoetarako Batzordea