EGABeko presidentearen bloga

Euskadiko Ekonomia eta Gizarte Arazoetarako Batzordea

Category: Datos (Page 1 of 6)

BREXIT

Hurrengo urteko martxoaren 29a

2019. urteko egutegiak data nabarmen bat du galdera marka handiz adierazita: martxoaren 29a. Egun horretan Brexita gauzatuko da, hau da, Erresuma Batua Europar Batasunetik aterako da. Ez dakigu egun horretan zer gertatuko den, beraz, galdera egutegiaren orriak pasatzen direnean argituko da. Arlo honetan etorkizuneko gertakariak ezin daitezke aurreikusi eta guztiak kezkati gaude, bai britainiarrak, bai europarrak. Horregatik, dibulgazio ekimenak, hala nola, aste honetan Bilbon egindakoa kontuan hartzekoak dira. Eusko Jaurlaritzak, Europar Batzordeak eta Madrilen Britainiako Enbaxadak antolatu dute.

“Brexita eta herritarren eskubideak” izan da astearteko jardunaldiaren izenburua eta hurrengoek parte hartu dute: Tim Hemmings Madrilen Britainiako Enbaxadako ministro kontseilariak, Jochen Müller Espainian Europar Batzordeko Ordezkaritzaren Sail Politikoko buruak eta Mikel Antón Eusko Jaurlaritzako Europar Gaietarako zuzendariak. Izenburuan iragartzen zen bezala, ez zen goi politikako hausnarketen saioa izan. Oso praktikoa suertatu zen, hain zuzen ere, beren eskubideei eragiten dizkieten herritarren kezkak landu ziren: egoitza iraunkorra, osasun laguntza, pentsioak eta gizarte prestazioak edo mugikortasuna, enpleguan eta hezkuntzan (bekak, trukeak…) izan ditzakeen ondorioekin. Ez da harritzekoa planteamendu horrekin jardunaldira zuzenean nahasitako pertsona ugari hurbiltzea, bereziki, gure Erkidegoan bizi diren Britainiako herritarrak.

Zorionak erakunde antolatzaileei jardunaldiak izandako ikuspuntuarengatik. Halako ekimenak edo duela urtebete Euskadiko Ekonomia eta Gizarte Arazoetarako Batzordeak antolatutakoa egiaz beharrezkoak eta argitzaileak dira. Nire ustez Brexitarekin guztiak aterako gara galtzaile eta, are gehiago, aldez aurretik adostasunera iritsi gabe egiten bada. Hala, lehentasunezkoa da eragin negatiboa minimizatzea eta ahalik eta gehien herritarren (britainiarren eta europarren) eskubideak babestea.

Post 20180910 Una situación preocupante, necesitada de una respuesta urgente

Egoera kezkagarria, premiazko erantzuna behar duena

Europar arazoa da. Demografia egoera Europar Batasunean kezka orokortua da duela urte batzuetatik hona. Euskal Autonomia Erkidegoan are kezkagarriagoa da arazoa. Azkeneko udal erroldak (2018ko urtarrila) gure erkidegoaren demografi geldialdia berriz errepikatzen du laugarren urtez ondoz ondo eta saldo begetatiboa negatiboa da. EAEn jaio baino jende gehiago hiltzen da eta datuen arabera, joera ez da itxaropentsua: 2016. urtean jaiotza-tasak % 3,2 egin zuen behera, aurreko urtekoarekin erkatuz gero.

Euskadiko Ekonomia eta Gizarte Arazoetarako Batzordea jada gaiari buruz ohartarazten hasia da. Gure azken txosten sozioekonomikoan egoera “oso kezkagarritzat jotzen genuen eta premiazko erantzuna eskatzen zuen”. EGABren iritziz, Euskal Autonomia Erkidego guztirako eredu orokorra behar da, eremu honetan politika publikoak modu zeharkakoagoan eta koordinatuagoa bideratzeko. Duela gutxi Jaurlaritzak eta euskal erakundeek familia eta haurtzaroarentzat itunak eta estrategiak planteatu dituzte eta aukera bat izan daitezke egungo demografia egoera alderantzika dezaketen neurriak hartzeko. Gogorarazi eta balioztatu behar dugu gure demografia oreka atzerriko biztanleei esker mantentzen dela. Beren ekonomia eta kultura ekarpena demografia bermea da, ez bakarrik hemen, baita Europa osoan ere. Izan ere, etorkinengatik Europar Batasunak nazioartean bere garrantzia manten dezake.

Ez dut atari hau amaitu nahi nahiko berria den fenomenoa azpimarratu gabe, hain zuzen ere, gure Autonomia Erkidegotik goi mailako titulazioak dituzten pertsonak irtetea. Joera honek jarraitzen badu eta biziagotzen bada, baldintza kualitatiboetan arazo larria izango dugu. Horregatik garaiz jardun behar dugu fenomeno honen arrazoiak aztertu eta euste neurriak hartzeko. Helburua giza kapitalaren galera geldiaraztea da.

MEMORIA

2017ko Memoria Sozio-ekonomikoa: Hobekuntza geldiko urtea

Oro har, azken urteotan hobera doa Euskal Herriaren egoera sozial eta ekonomikoa, nahiz eta krisi ekonomikoaren aurreko maila berreskuratzetik oraindik ere urruti gauden. Alderdi sozio-ekonomikorik gehienak hobetu dira, baina geldiro-geldiro. Ondorio hori ateratzen da Euskadiko Ekonomia eta Gizarte Arazoetarako Batzordeak urtero argitaratzen dituen azken Memoria Sozio-ekonomikoak irakurri ostean. Horietako azkena, 2017. urteari dagokiona, uztailaren 10ean argitaratu zen.
Memoria horretarako idatzi nuen aurkezpen-testuan 2017. urtea, oro har, euskal ekonomiarako ekitaldi positiboa izan zela adierazi nuen. Gora egin zuten jarduera ekonomikoak eta enpleguak, nahiz eta kontsumoa eta ekipo-ondasunen arloko inbertsioa hain sendo ibili ez. Halaber, EEGABren Memorian agertzen den defizit kezkagarrienetako bat ere azpimarratu nuen; izan ere, Espainiako eta Europako defizitaren batez bestekoa baino handiagoa da gure defizita. Energia-mendekotasunaz ari naiz. Hain zuzen ere, Brent petrolioaren igoerek alerta egoeran jartzen gaituzte etengabe, susperraldi ekonomikoa atzeratu baitezakete. Energiaren alorreko eredua aldatzearen aldeko apustua egin behar dugu, gurean eredu eragingarriagoa eta iraunkorragoa gauzatze aldera. Eta, aldi berean, aurrera egin behar dugu egungo dimentsio urria gainditzen duen eta lehia arloan hazten lagunduko digun ekoizpen-egitura eratzen; horrela, krisialdian galdu genuen aberastasuna eta enplegua berreskuratuko ditugu (ehun mila lanpostutik gora 2009-2013 laurtekoan, Autonomia Erkidegoan zegoen enplegu-tasaren guztirakoaren hamarrena). Hala eta guztiz ere, 2017. urtean hoberantz egin zuten lan-merkatuaren adierazkaririk gehienek, bai eta gure bizi-baldintzak islatzen dituzten adierazkariek ere, Europako herrialde nagusienen pare-pareko gizarte-babeserako sistema baitugu (nahiz eta oraindik ere krisialdiaren aurreko maila berreskuratu ez). Esparru honetan, eta bai gainerakoetan ere, EEGABren Memoria Sozio-ekonomikoak gogoeta eta ohar interesgarriak biltzen ditu. Heldu diren egunetan helduko diot horietako gogoeta zehatz bati.

Page 1 of 6

© 2017 Copyright Consejo Económico y Social Vasco | Euskadiko Ekonomia eta Gizarte Arazoetarako Batzordea