EGABeko presidentearen bloga

Euskadiko Ekonomia eta Gizarte Arazoetarako Batzordea

Category: jornadas (Page 1 of 4)

Post_web_presidente

Bilbon aurkeztuko da Europako EGABen irizpen berria, eredu ekonomiko iraunkor berriei buruzkoa

Bilbon izango da aste honetan Europako Ekonomia eta Gizarte Arazoetarako Batzorde Ekonomikoaren analisi interesgarriaren aurkezpena, eredu ekonomiko iraunkor berriei buruzkoa. Europako Ekonomia eta Gizarte Arazoetako Batzordeak kontu horri buruzko irizpena eman du Europako Batzordeko lehenengo presidenteak, Frans Timmermans-ek, hala eskatuta.

Lanaren edukia oso baliotsua da, eta gomendioen dekalogo bat du hazkunde iraunkorreko eredu ekonomikoak behar bezala egituratzeko. Gizartea orokorrean kontzientziatuago dago, gaur egungo erronkei eman beharreko erantzuna beti iraunkortasunean oinarritu behar denaren pentsamenduak geroz eta indar gehiago baitu. Enpresek, administrazioek, eragile sozial eta ekonomikoek eta herritarrek ulertu dugu iraunkortasuna ezin ukatu daitekeen elementua dela edozein hazkunde arduratsuko eredutan. Konpromiso honen adierazle da egunean-egunean gehiago ezagutzen ditugula zenbait gai, besteak beste ekonomia zirkularra, lankidetzako ekonomia, ekonomia soziala eta solidarioa edo finantza arduratsuak. Kontzeptu berri horiek iraunkortasunaren agintea adierazten dute eta Europako Ekonomia eta Gizarte Arazoetarako Batzordeak defendatzen dituen eredu ekonomiko berrien egitura antolatzen dute. Lehendabizi eredu horiek ezartzen dituzten lurraldeek abantaila handiak izango dituzte, eta Euskadik nahikoa zutabe ditu Europako eskualdeen artean aurreneko postuetan jartzeko, horiek zuzen antolatzen badira.

Europako azterketa hurrengo ostiralean, apirilaren 13an, aurkeztuko da Jardunaldi Ireki Batean, Euskadiko Ekonomia eta Gizarte Arazoetarako Batzordearen egoitzan. Gainera, bertan egongo dira zenbait hizlari eta mahai-inguru bat ere egingo da. Ondoren, eztabaida irekia egongo da bertaratuek parte hartu ahal izateko. Goizeko hamar eta erdietatik aurrera izango da hitzordua. Ahal baduzue, ez galdu aukera.

JORNADA 13 DE ABRIL_INVITACION

Jornada organizada por CES CyL

Georges Dassis-ekin Valladoliden

Europa soziala Europan sortu zen, eta egun dauden bat ez etortzeak nahiz desorekak gainditzeko modu bakarra Kontinente Zaharraren “gizarte-dimentsioa” berreskuratzea da. Georges Dassis-en hitzetan: “erronka nagusia herritarrengandik gero eta gertuago dagoen Europa lortzea da”.

Georges Dassis Europako Ekonomia eta Gizarte Komitearen presidentea da. Eskarmentu handiko sindikalista greziarra da. Ibilbide demokratiko luzea egin du dagoeneko, eta aurreko mendeko hirurogeita hamarreko hamarkadan bere herrialdea astindu zuen Koronelen Diktaduraren aurkari gisa hasi zen. Europako EEGLko burua da 2015. urtetik, eta joan den astelehenean Valladolidera joan zen, elkarrizketa sozialaren gaineko jardunaldi batean parte hartzeko xedez, Gaztela eta Leongo Ekonomia eta Gizarte Kontseiluak antolatutakoa. Hain zuzen ere, Dassis-ek saioa ireki zuen Europar Batasunaren erronkei heldu zien aurkezpen batekin. Hasierako esku-hartze horren ostean, programatutako bi mahai-inguruetako lehenengoa hasi zen; Europa, Espainia nahiz eskualdeko testuinguruan dagoen elkarrizketa sozialaren gaia jorratu zuena. Dassis-ekin batera, honako hauek hartu zuten parte: Espainiako Ekonomia eta Gizarte Kontseiluko presidenteak, Marcos Peña, eta Gaztela eta Leongo Ekonomia eta Gizarte Kontseilukoak, Germán Barrios. Debatean, Dassis-ek argudiatu zuen elkarrizketa soziala Europako akordio garrantzitsuen oinarri dela, ondoren zuzentarau, gomendio eta protokolo gisa mamitu direnak. Adibide bezala gurasotasun-baimenari dagokionez 1995. urtean lortutako adostasuna aipatu zuen, erkidegoko zuzentaraua sortu baitzuen (96/34 Zuzentaraua). ”Elkarrizketa soziala aurrerapen soziala da” ondorioztatu zuen Dassis-ek. Marcos Peñak, berriz, Europak irudikatzen duen singularitatea gogorarazi zuen; izan ere, gizarte-estaldurako munduko espaziorik handiena da, eta iragarri zuen identitate hori hausteak Europako amaiera ekarriko lukeela. Hausnarketa sakonak izan ziren, eta planteamendu demagogiko eta populistek Europako proiektua barrutik zalantzan jartzen duten unean heldu dira. Benetan ohartu al gara horretaz?

Creación de empresas y empleo

Enpresak eratzea lana sortzeko

Ekonomiaren berreskuratzea neurtzeko tresna ezin hobea enpresen sorrera da. Espainian azken bi urteetan sortu diren enpresen kopurua handiagoa da itxi diren enpresen kopurua baino. Datuek egiaztatu dutenez, krisiaren hasieran sortu zen egoera negatiboa aldatu egin da. Halaxe dago jasota Espainiako EGABek egindako txostenean. Hala, bere lankidetzarekin, Gaztela eta Leongo EGABek jardunaldi bat antolatu du orain dela gutxi Valladoliden eta bertara gonbidatuak izan gara gainerako Ekonomia eta Gizarte Batzordeak. Jardunaldiaren izenburua “Enpresen sorrera Espainian eta horien inpaktua enpleguan” izan zen eta arlo horretan adituak diren hizlariak eta pertsona ekintzaileak batu ziren bertan. Guztiak ados zeuden adieraztean enpresa bat sortzea lan neketsua dela, eta gizarte osoaren bultzada eta konpromisoa behar duela, enpresa garatzeko oztoporik ez dela egon behar alegia.

Beste kontu batzuen artean, betiko eztabaida-gaia den gure enpresa gehienen tamaina txikiari buruz hitz egin zen, horren ondorioz zaila baita enpresal ondoren nazioartekotzea. Denen iritziz, enpresen tamainaren hazkuntza erreala eta eraginkorra lortzeko modu bakarra naturaltasunez gauzatzea da, injerentziarik gabe. Ez dago fusioak telegidatzeko makilatxo miragarririk, baina posible da lan handia egitea enpresen hazkuntzari eta enpresa berrien sorrerari bultzada emateko testuingurua sortzeko. Azken finean, enpresak sortzea taldekako konpromiso soziala da, ardura hori hartzen duten pertsona ekintzaileetatik haratago. Pertsona horiei babesa eskaini behar zaie eta saiakeran ziur egotea eta borondate sendoa izatea eskatuko zaie, porrotari beldurrik izan gabe. Azken horri buruz, jardunaldiko hizlari baten esperientzia pertsonalak bikaintasunez islatu zituen bertute horiek: Enpresari lanetan bere jaioterrian hasi zen, Portugalekin mugakidea den herri batean, dirua aldatzeko leihatila ñimiño batean hain zuzen ere. Baina euroa iristean negozioa suntsitu egin zen eta beldurtu baino abenturan murgildu zen, eta orain Global Exchange Group dirua aldatzeko mundu mailako bigarren agentzia da, nagusia nazioarteko aireportuetan.

Page 1 of 4

© 2017 Copyright Consejo Económico y Social Vasco | Euskadiko Ekonomia eta Gizarte Arazoetarako Batzordea