EGABeko presidentearen bloga

Euskadiko Ekonomia eta Gizarte Arazoetarako Batzordea

Category: Memoria Socioeconómica

envejecimiento población

Arduratzeko moduko kontua

Geraldi demografikoari buruz ari naiz. Arduratzeko moduko kontua da, hazkuntza begetatibo negatiboa arazo larria ari delako bihurtzen Euskadirentzat. Aldaera hau jaiotza eta heriotzen arteko alderi lotuta dago, migrazio-mugimenduak aintzat hartu gabe. Euskadin saldo hori negatiboa izan da 2016an hirugarren urtez jarraian. Berriz ere heriotzak hazi egin ziren berez zahartuta dagoen biztanleriaren artean, eta gainditu egin zuten jaiotzen kopurua.

Europar Batasunean ere iaz, lehenengo aldiz, hazkuntza natural begetatibo negatiboa gertatu zen, zorionez, azken hamarkadetan gertatu den bezala, migrazio-fenomenoarekin konpentsatu zena. Euskadiko Ekonomia eta Gizarte Arazoetarako Batzordeak argitaratzen duen Memoria Sozioekonomikoa 2016 txostenak argitaratzen dituen Eurostat estatistikako datuak kontsultatu ditut eta egiaztatu dut Europar Batasunak 510 milioi biztanle zituela iazko urtearen hasieran, urte bat arinago, 2015ean, baino ia bi milioi biztanle gehiago. Europako biztanleriari dagokionez etenik gabeko hazkuntzaren joera hori mantendu egin da azken sei hamarkadetan -1960an 400 milioi biztanle zituen-, immigrazioaren ondorioz.

Bilakaera demografiko negatiboa areagotu egingo da datozen urteetan. EIN erakundeak egin dituen kalkuluen arabera 15 urteko epean (2016-2031) Espainiak milioi erdi biztanle baino gehiago galduko ditu: bere biztanleen % 1,2. Horietatik 80.000 EAEkoak izango dira, hau da, euskal biztanleen % 3,7.

Euskadiko Ekonomia eta Gizarte Arazoetarako Batzordea arduratuta dago bilakaera demografiko horrekin eta hurbileko etorkizunerako azaltzen diren joerekin. Horixe azaldu du arestian aipatu den Memoria Sozioekonomikoan ematen dituen ohar eta iruzkinetan; txosten horretan inplikatuta dauden eragile guztiei, bereziki arlo honetan zuzeneko ardura duten botere publikoei, gaiari berehala ekiteko eta lehentasuna emateko eskatu die, bilakaera horrek arriskutan jartzen duelako gure gizartearen etorkizuneko eboluzio eta aurrerakuntza harmoniatsua.

Memoria Socioeconómica

Inplosioen urtea

Izenburu hori eman diot Euskadiko Ekonomia eta Gizarte Arazoetarako Batzordearen Memoria Sozioekonomikorako prestatu dudan sarrerari. Asteon bertan aurkeztu diegu Lehendakariari, Eusko Legebiltzarraren lehendakariari eta iritzi publikoari. 2016ko Memoria Sozioekonomikoak hainbat datu sozioekonomiko biltzen ditu, jatorrizko iturrietatik datorren informazioa kontrastatzen du eta EEGABn Memoria hau egiteko ardura duten batzordekideen eztabaidapeko iritzi adostu guztiak aberasten ditu.

Memoriaren sarreran idatzi nuenez, 2016. urtean bi inplosio gertatu ziren batik bat, Ozeano Atlantikoaren bi aldeetan; inplosiook ziurgabetasun eta zalantza aski handia eragin zuten munduko herrialderik gehienetan, ez baitzen halakorik espero. Argi dagoenez, bi gai hauek ditut berbabide: lehena, ekainekoa, Erresuma Batuak erreferendum bidez Europar Batasunetik ateratzea erabaki zuenekoa, eta bigarrena, azarokoa, Estatu Batuetako legegintzako eta presidentetzarako hauteskundeei dagokiona. Ez Brexita ez Trump ez ziren nazioarteko aurreikuspenen agendaren goiko aldean agertzen, baina biek atzeman zuten agendaren leku hori, eta izu-ikaraz gainera. Petrolioa esportatzen duten nazioek ere euren ekoizpena murrizteko erabakia hartu zuten, eta horrek, noski, areagotu egin zuen urte amaieran ziurgabetasun-giro hori.

Zalantzaz beteriko urteari dagokion testuinguru horretan, euskal ekonomia hazi egin zen jarduera ekonomikoen eta enpleguaren arloan; izan ere, 2016. urtekoa ekitaldi positiboa izan zela esan dezakegu. EAEren emaitza ekonomikoak aurreko urtekoak baino hobeak izan ziren, ekonomiak bi dezima gora egin baitzuen; are, enplegua ere sortu zen eta langabeziak behera egin zuen, arazo horrek egonkortzera jotzen baitu. 2016ko Memoria Sozioekonomikoak zehatz-mehatz jasotzen ditu adierazkari horiek guztiak eta beste batzuk; aldi berean, aholkularitza-batzordea denez, garrantzizkotzat jotzen ditugun hobekuntzarako arloak ere adierazten ditu. Horrenbestez, Gure Memoria Sozioekonomikoa kontsultatzera gonbidatzen zaituztet, atseginez.

© 2017 Copyright Consejo Económico y Social Vasco | Euskadiko Ekonomia eta Gizarte Arazoetarako Batzordea